होटलमा बसेर नातेदारलाई खोप, बिर्तामोडका स्वास्थ्य प्रमुख पक्राउ

होटलमा बसेर नातेदारलाई खोप, बिर्तामोडका स्वास्थ्य प्रमुख पक्राउ

देशभर खोप अभियान चलिरहेका बेला सरकारी निकायले गरेका लापरबाही एकपछि अर्को गर्दै सार्वजनिक भइरहेका छन्। विराटनगर महानगरपालिका प्रमुख भीम पराजुलीले आफन्तलाई लगाइदिन भन्दै खोप नै बोकेर हिँडेको समाचार सेलाउन नपाउँदै झापाको बिर्तामोडमा स्वास्थ्यकर्मीको अर्को बदमासी भेटिएको छ।

सर्वसाधारण नागरिकले एक डोज खोपका भौतारिनु परिरहेका बेला झापाको बिर्तामोडस्थित एक होटलमा लुकाएर राखिएको अवस्थामा कोरोनाविरुद्धको १ सय तिन भायल खोप बरामद भएको हो। उक्त खोप नातेदार र आफन्तलाई लगाउँदै गरेको अवस्थामा त्यहाँस्थित स्वास्थ्य प्रमुख नै पक्राउ परेका छन्।

बिर्तामोड नगरपालिका-१ स्थित होटल टायम लेसमा लुकाएको १०३ भायल खोपसहित बिर्तामोड नगरपालिकाको कार्यालयका जनस्वास्थ्य प्रमुख ओम खड्का पक्राउ परेका हुन्। उनलाई सत्तारूढ नेकपा माओवादी केन्द्र र नेपाली कांग्रेसका नेकार्यकर्ताको समूहले समातेका हुन्। होटलबाट बरामद खोप प्रतिभायल दुई डोज रहेको खुलेको छ।

उनले केही दिनयता त्यही होटलमा नातेदार र अन्य नजिकका मानिसहरुलाई बोलाएर खोप लगाउने गरेको सूचना दलका कार्यकर्ताले पाएका थिए। त्यसपछि उनलाई माओवादी केन्द्रका कार्यकर्ताले शुक्रबार अपरान्ह ४ बजे उक्त परिमाणको खोपसहित नियन्त्रणमा लिएका हुन्।

जिल्ला स्वास्थ्य कार्यालयले विरुद्ध सञ्चालित खोप अभियानमा कुनै अनियमितता नभएको जनाएको छ । विर्तामोडको टाइमलेस होटलबाट स्वास्थ्य शाखा विर्तामोडका फोकलपर्सन ओमबहादुर खड्कालाई १०३ भाइल भेरोसिल खोपसहित शुक्रबार नियन्त्रणमा लिइएको घटना सम्बन्धमा रासससँग कुरा गर्दै कार्यालय प्रमुख योगराज घिमिरेले खोप लुकाइएको भन्ने आरोप गलत भएको बताए ।

“विर्तामोडमा खोप अभाव भएको हुँदा स्वास्थ्य कार्यालयका खोप प्राविधिक बालकृष्ण भण्डारी र कर्मचारी विशाल घिमिरेलाई १०३ भाइल खोप पठाएका थियौँ”, कार्यालय प्रमुख घिमिरेले भने, “इएलएमआइएस प्रणालीमा दर्ता गरेर इमेलसमेत गरेर हामीले वैधानिकरुपमा खोप पठाएका हौँ, तर खोप होटलमा लुकाइयो भनेर अफवाह फैलाइयो ।”

उनले खोप अभियानमा संलग्न स्वास्थ्यकर्मी खाजा खान होटलमा रहेका बेला खोप पुगेको हुँदा स्वास्थ्य कार्यालयका कर्मचारीले विर्तामोडको टाइमलेस होटलमै नगरका फोकलपर्सन खड्कालाई खोप बुझाएको जानकारी दिए । नगरपालिका कार्यालयको साटो होटलमा खोप बुझाउनु र बुझ्नु कमजोरी भएको स्वीकार गर्दै उनले अबदेखि यस्तो गल्ती दोहोरिन नदिइने प्रतिबद्धता व्यक्त गरे।

शुुक्रबार अपराह्न ४ः०० बजेतिर स्थानीय युवाले होटलमा खोप राखिएको विषयमा वि’वाद गरेपछि इलाका प्रहरी कार्यालय विर्तामोडले सो खोप र नगरका स्वास्थ्य शाखाका फोकल पर्सन खड्कालाई नियन्त्रणमा लिएर जिल्ला स्वास्थ्य कार्यालयमा बुझाएको थियो ।

फोकलपर्सन खड्कालाई आज जिल्ला प्रशासन कार्यालयमा छलफलमा उपस्थित हुने शर्तमा घर पठाइएको र प्रहरी नियन्त्रणमा रहेको सो खोपलाई स्वास्थ्य कार्यालयको स्टोरमा राखिएको कार्यालय प्रमुख घिमिरेले बताए । उनका अनुसार जिल्लामा ६३ हजार ५०० भेरोसिल खोप आएको र सबै खोप स्थानीय तहमा पु¥याइएको छ ।

Leave a Reply

Your email address will not be published. Required fields are marked *